bjúgur og eldrauðir fætur

Gott kvöld.

Ég var að byrja vinna eftir árshlé og fæturnir á bólgnuðu helling upp, mikill bjúgur, svo í morgun var ég úti með krökkunum sem ég er að vinna með og er þá orðin eldrauð neðanlega á kálfunum og sköflungunum, svíður allveg ofboðslega.
Hvað gæti það verið? ( Er alltof þung)

Sæl og takk fyrir fyrirspurnina

Bjúgur er vökvasöfnun sem getur ýmist verið staðbundin eða útbreidd um líkamann. Bjúgur er ekki sjúkdómur í sjálfu sér heldur einkenni einhvers kvilla. Bjúgur myndast þegar bláæðar halda ekki sama rennslishraða og slagæðar svo að blóðrennsli að líkamshluta er meira en blóðflæði frá honum. Orsakir þessa geta m.a. verið langstöður sem valda bólgum í fótum eða ökklum, þröngur fatnaður, linir vöðvar í fótum, sértaklega kálfum, mikil saltneysla, heitt veðurfar, sum lyf, hungur og vannæring, æðahnútar, fyrirtíða einkenni, þungun, tíðablæðingar, notkun getnaðarvarnalyfja, offita, lifrasjúkdómar, hjartasjúkdómar og fl. Það er greinilegt að aukið álag sem fylgir því að byrja að vinna aftur verður til þess að þú færð bjúg og miðað við þær upplýsingar sem þú gefur er erfitt að segja til um hvað það er sem er að valda þessu.  Ég ráðlegg þér því að panta þér tíma hjá heimilislækni og fá  hjá honum góða skoðun. Besta meðferð við bjúg er að greina orsök hans og meðhönla hana.

Gangi þér vel