Blóð undir húð

Góðan dag, mig langar að vita hvort einhver getur sagt mér hvers vegna ég fæ, blæðingu undir húðina á framhandleggnum, ef ég rek mig í eða t.d klóra mér? Þetta verða blóðblettir í dálítinn tíma( ca 10-14 daga) svo verður þetta að ljósbrúnum blettum. Þetta er eingöngu bundið við handleggina frá olnboga og að úlnið.

 

Sæl/l og takk fyrir fyrirspurnina.

Það geta verið ýmsar ástæður fyrir þessu. Með hærri aldri þynnist húðin og veitir ekki sömu vörn gegn áverkum. Sterar þynna einnig húðina.Litlu háræðarnar undir húðinni springa þá auðveldar og marblettir koma fram. Ýmis lyf og jafnvel fæðutegunir t.d. olíur eru blóðþynnandi og draga úr storkuhæfni blóðsins. Þá blæðir meira við áverka með tilheyrandi mari. Vítamínskortur t.d. C vítamín getur einnig komið fram með aukinni marblettamyndun.  Ýmsir sjúkdómar geta einnig dregið úr storkuhæfni blóðsins og gert húðina þynnri. Ég ráðlegg þér að fara til þíns heimilislæknis sem skoðar þig og tekur jafnvel blóðprufu til skoða hvort eitthvað er að blóðmyndun hjá þér.

 

Gangi þér vel