Hvað er TSS sjúkdómur og hver eru einkennin?

Spurning:
Góðan daginn.
Ég var að lesa leiðbeiningarseðilinn sem kemur med ob tíðatöppum og rakst á að þar var verið að vara við TSS sjúkdóm sem getur komið við notkun tíðatappa. Hvað er TSS sjúkdómur og hver eru einkennin?

Svar:
Ágæti fyrirspyrjandi.
TSS stendur fyrir Toxic Shock Syndrome. Þetta er sjaldgæfur sjúkdómur sem stafar af þeirri hættu að ganga of lengi með eða gleyma að fjarlægja tíðartappa. Hættan sem því er samfara er að ákveðnar bakteríur geta farið að vaxa í ofgnótt, oftast svokallaðir Stafílokokkar (Staphylococcus Aureus). Gerist það getur notandinn veikst, fengið háan hita 39 gráður Celcius, og einkenni eins og ógleði, niðurgang, útbrot, svima, ljósfælni, vöðvaverki, hnakkastirðleika, blóðhlaupin augu og blóðþrýstingsfall (shock). Þetta ástand þarfnast tafarlausrar aðgerðar og meðferðar á sjúkrahúsi með sýklalyfjum, vökva í æð og annarri bráðameðferð. Þetta er sem betur fer mjög sjaldgæft, en best er að forðast að útsetja sig fyrir þessu með því að skipta reglulega um tíðatappa og nota ekki tappa með hámarksvökvadrægni nema þegar tíðir eru sem mestar og skipta þá oftar um. Því er mikilvægt að gæta að því að gleyma ekki að fjarlægja tíðatappa og gá ef þú ert ekki viss hvort þú hafir fjarlægt þann sem þú setter upp síðast. Ég vil þó ítreka að þetta ástand er sem betur fer mjög sjaldgæft.

Gani þér vel, Arnar Hauksson dr med.