Börn á skriðaldri – öryggisráðstafanir

Þurfa börn á skriðaldri sérstakar öryggisaðgerðir á heimilinu?

Mörg slæm slys verða á börnum á heimilinu. Þau brenna sig, detta niður stiga, fá þunga hluti í höfuðið og jafnvel detta út um glugga ef þeir eru ótraustir.

Börn, sem eru farin að skríða og brölta á fætur eru yfirleitt á ferð og flugi og mikill kraftur í þeim. Þau geta verið eldsnögg í förum og horfin sýnum eins og hendi sé veifað. Því er um að gera að gera heimilið eins öruggt úr garði og hægt er, og fylgjast árvökull með barninu öllum stundum.

Ef heimilið er öruggt léttir það bæði börnum og foreldrum lífið. Foreldrarnir þurfa ekki að vera á nálum vegna uppátækja barnsins. Þeir þurfa ekki að vera að hrópa og kalla boð og bönn í tíma og ótíma. Barnið hefur líka betri aðstæður til að rannsaka öruggt umhverfi án þess að allt of margt sé bannað.

Hvaða öryggisráðstafanir áttu að gera í eldhúsinu?

Eldhúsið er spennandi staður fyrir barnið. Þar eru skúffur, skápar, eldavél, rafmagnstæki og kælikápur. Þar er margt sem þarf að rannsaka. Hnífar til dæmis.

Skúffur má tryggja á tvo vegu. Hægt er að setja á þær stoppara, þannig að þær dragist ekki alla leið út og svo að barnið eigi ekki á hættu að fá þær yfir sig. Einnig má setja á þær öryggisloka, svo að barnið geti ekki opnað þær. Í skúffunni geta verið hlutir sem barnið má ekki leika sér að, og það getur líka klemmt sig illa, þegar það reynir að loka henni aftur. Litla barnið hefur ekki fullkomið vald á hreyfingum sínum. Barnið lokar skúffunni ekki varlega heldur af öllu afli.

Farðu gætilega með hreingerningaefni og þvottaduft

– þetta geta verið ætandi efni

Það sama á við um eldhússkápana. Hægt er að setja á þá öryggislæsingar svo að barnið geti ekki opnað þá. Sérstaklega er mikilvægt að gæta öryggis ef í skápnum eru hættuleg eða eitruð efni. Uppþvottaefni, hreingerningaefni, þvottaduft, ræstiduft, terpentína, grillvökvi og blómaáburður eru stórhættuleg og eitruð. Þau má ALDREI geyma í ólæstum skápum. Þvottaduft fyrir uppþvottavélar er afar hættulegt vegna þess að það er mjög ætandi efni.

Kæliskápurinn er jafn hættulegur og aðrir skápar en þar leynast fleiri hættur. Illa getur farið ef barnið freistast til að skríða inn í hann. Ef hurðin lokast fyrir slysni getur barnið orðið fyrir súrefnisskorti og ofkælst hættulega. Því er ekki úr vegi að koma fyrir öryggisloku á kæliskápinn.

Það er gaman að kippa í snúruna á rafmagnskatlinum

Ef þú ert með rafmagnstæki eða rafmagnsketil verðurðu að sjá til þess að barnið kippi ekki tækinu eða katlinum, með innihaldi, fram af borðinu og yfir sig. Hægt er að koma í veg fyrir þetta með því að vera með haldara fyrir snúrurnar og sjá til þess að þær nái aldrei fram af borðbrúninni. Einnig má stytta snúrurnar.

Einnig má minnka hættuna sem stafar af eldavélinni og bakarofninum. Til að barnið brenni sig ekki á eldavélarhellunum eða grípi í potta eða pönnuhandföng má setja öryggisgrind framan á eldavélina. Einnig má setja öryggisloku á hurðina á bakarofninum til að barnið geti ekki opnað hana. Auk þess er hægt að koma fyrir loku sem hindrar barnið í að kveikja á ofninum og stilla hitastigið. Gættu þess að bakarofnshurðin getur orðið svo heit að barn getur brennt sig á henni. Hægt er að verja barnið með því að byrgja fyrir með grind.

Hvaða öryggisaðgerðir á að gera í stofunni og öðrum herbergjum?

Í stofunni og öðrum herbergjum geta verið skúffur og skápar, eins og í eldhúsinu. Þau þarf að gera örugg eins og lýst er í kaflanum um eldhúsið.

Auk þess eru í stofunni mörg hvöss horn. Þau má verja með því að setja á þau þar til gerðar plasthlífar. Þær eru ekki mjög „smart“ þegar Guðríður frænka kemur í heimsókn, en gera sitt gagn meðan barnið er að staulast fyrstu skrefin.

Hurðir geta verið slysagildrur. Því er ráðlegt að setja dempara á eða undir þær, til að barnið klemmi sig síður. Fleygar eru hentugir.

Útsýnisgluggar

Þegar barnið fer að príla verður að fylgjast með gluggunum. Börn eru eldsnögg að príla upp og detta út. Öruggast er að setja öryggisstormjárn á gluggana þannig að ekki sé hægt að opna þá meira en 10 cm. Best er að festa þau efst á gluggana til að barnið geti ekki átt við þau.

Sárt að fá hillur í höfuðið

Hillur eru sérlega freistandi klifurgrindur fyrir börn. Til að forða því að hillan falli ofan á barnið má festa hana við vegginn með vinkli.

Laus teppi og mottur eru hættuleg fyrir barn, sem er að læra að ganga. Það getur hrasað og dottið um bylgjur og kanta. Leggðu gúmmínet undir teppin og slepptu lausum mottum þangað til barnið er orðið eldra.

Borðdúkar eru tilvalinn stuðningur fyrir smábörn til að hífa sig upp. Borðdúka má festa með dúkaklemmum, svo að síður sé hætta á að barnið togi þá yfir sig ásamt öllu skrauti eða borðbúnaði sem fylgir með.

Rafmagnsbúnað þarf að gera öruggan um allt hús. Ef engin rafmagnstafla er í íbúðinni þarf að láta setja hana upp. Öllum innstungum á að loka með sérstöku plastloki sem barnið á ekki að geta losað. Rafmagsslys eru alltaf mjög háskaleg. Þau geta valdið djúpum þriðju stigs brunasárum eða bráðum bana.

Hvað ber að varast á baðherberginu?

Baðherbergið er spennandi af því að þar er hægt að skrúfa frá krönum. Hafa ber í huga að ekki þarf dýpra vatn en 10 cm til að lítið barn geti drukknað. Ef andlit þess lendir í vatni andar það ósjálfrátt að sér til að öskra. Lungun fyllast af vatni og það drukknar. Jafnframt missir barn umhverfisskyn ef höfuð þess fer á kaf í vatn og því skynjar það ekki hvort það eigi að koma upp úr kafi eða reisa sig upp. Klósettinu má loka með tveim klemmum til að barnið geti ekki opnað það sjálft. Ráðlegt er að geyma tappann annars staðar en í baðkerinu því að barnið gæti sett tappann í og fyllt baðkarið. Vatnskranar fást með hitastillum svo að barn geti ekki skrúfað frá brennandi heitu vatni. Ef vatnið er hitað í vatnshitara er vissara að stilla hitastigið hæfilega lágt til að ekki sé hætta á brunaslysum.

Lyf eru svo skemmtileg í útliti – sérstaklega gulu pillurnar

Lyf þarf að geyma í læstum skáp svo að ekki sé hætta á að barnið geti tekið þau inn.
Lyfjaeitranir geta verið bráðhættulegar.

Enginn vandi er að steypa sér í kollhnís niður stiga

Fram að fjögurra ára aldri eru stigar hættulegir börnum. Hægt er að loka þeim með hliði. Ef bil er milli tröppu og uppstigs á að loka því til að barnið detti ekki þar niður eða troði þar höfðinu og festi sig. Að sjálfsögðu er stórvarasamt ef barnið er að príla á handriðinu og dettur niður. Barn getur fest höfuðið milli rimla á handriði ef bilið milli þeirra er meira en 7,5 cm.

Heilbrigð skynsemi ræður því hve langt er gengið í öryggisráðstöfunum. Ótækt er að búa við miklar slysagildrur. En það er hægt að ganga of langt og gera heimilið líkara sótthreinsuðum öryggisbúðum. Best er að öryggisráðstafanir á heimilinu séu innan skynsamlegra marka.