Engin sárarsóttartilfelli á Íslandi 2007

Fjöldi þeirra sem greinist með lekanda hefur farið vaxandi síðastliðin ár eins og fram kom í janúartölublaði Farsóttafrétta. Lekandi er algengari sjúkdómur en sárasótt og endurspeglar því fyrr breytingar í kynhegðun manna en sárasóttin, en telja má líklegt að aukin áhættuhegðun liggi að baki fjölgun lekandatilfella.

Forsendur fyrir sárasóttarsmiti ásamt öðru kynsjúkdómasmiti virðast þannig hafa vaxið, ekki síst vegna aukins fjölda sárasóttartilfella
í stórborgum erlendis og sífellt vaxandi ferðaþrár Íslendinga. Af þeim sökum vill sóttvarnalæknir hvetja landsmenn til varúðar.
Á árinu sem leið greindist enginn einstaklingur með sárasótt á Íslandi. Síðastliðin ár hafa fáeinir einstaklingar greinst með sárasótt
á hverju ári en nánast undantekningalítið hefur viðkomandi orðið fyrir smiti erlendis. Þetta bendir til þess að sárasótt hafi
ekki náð útbreiðslu hérlendis, en í stórborgum erlendis hefur sárasótt ásamt öðrum kynsjúkdómum farið hratt vaxandi.
Eru karlmenn sem stunda kynlíf með körlum sérstakur áhættuhópur að þessu leyti.
Sárasótt er fremur sjaldgæfur kynsjúkdómur um þessar mundir, tilfelli eru mjög fá hérlendis ár hvert og því eðlilegt að fjöldi tilfella
sveiflist lítillega milli ára án þess að raunveruleg breyting á tíðni sjúkdómsins hafi orðið.

Pistill þessi birtist fyrst í Farsóttarfréttum 4.árg.4.tölublað í Apríl 2008