Spurning:
Sæl.
Ég er 19 ára stelpa og var að koma úr blóðrannsókn. Ég reyndist vera með lágt s-ck gildi. Mig langar til að vita hvað þýðir það og hvað ég get gert til þess að hækka þetta gildi.
Með fyrirfram þökkum.
Svar:
Svar til 19 ára stúlku með lágt CK.
CK er skammstöfun fyrir enska heitið á kreatínkínasa, ensími sem finnst í vöðvafrumum.
Það er ekkert óeðlilegt við að hafa lágt CK í blóði, við höfum meiri áhyggjur af háum gildum. CK hækkar í blóði við bólgur og skemmdir í vöðvum, en þá lekur CK út úr vöðvafrumunum og verður því hærra í blóðinu sem skemmdin er meiri.
Mikil og ströng líkamsþjálfun mundi að öllum líkindum leiða til hækkunar á CK í blóði.
Með kveðju,
Elín Ólafsdóttir, læknir Hjartavernd