Hef heyrt að gott sé að sjóða nýjar rauðrófur og drekka safann, hefur það gagnleg áhrif á æðaþrengsli í fótum. Takk.
Komdu sæl/l og þakka þér fyrir fyrirspurnina.
Sumir tala um rauðrófur og rauðrófusafa sem ofurfæðu. Rauðrófur eru ríkar af næringarefnum eins og C-vítamíni, fólínsýru, járni, magnesíum, kopar, kalíum, mangan, fosfór, trefjum, andoxunarefnum og nítrötum.
Hráar rauðrófur er ríkar af nítrati. Í líkamanum fara fram efnaskipti sem breyta nítrati í nituroxíð sem hefur mörgum hlutverkum að gegna í líkamanum t.d. í blóðflæði, samdrætti vöðva, æðavíkkun og fleira. Einnig eru rauðrófur trefjaríkar og því góðar fyrir meltinguna.
Neysla á hráum rauðrófum eða kald-pressuðum rauðrófusafa getur haft jákvæð áhrif á blóðþrýsting og blóðflæði með því að hafa æðaslakandi áhrif og hugsanlega til lækkunar á blóðþrýstingi.
Gangi þér vel,
Sigríður Ólafsdóttir, hjúkrunarfræðingur