Hvað getur valdið því að ég er búin að vera með leiðinlega bauga undir augunum í ca 2 ár ? Er reyndar 72 ára.
Sæl og takk fyrir fyrirspurnina.
Baugar eða pokar undir augum ganga oft í erfðir og þá lítið hægt að gera við því. Með árunum þynnist einnig húðin undir augum og á augnlokum og þá verða æðar sýnilegri og augnumgjörð dökknar við það. Ef miklir pokar fylgja baugum er þar vökvasöfnun sem getur komið í kjölfar mikillar saltneyslu eða minna þol fyrir söltum mat eða þreytu. Húðin gefur einnig meira eftir þegar við eldumst og vökvi safnast því auðveldar fyrir í hrukkur og fellingar og mynda poka. Ef pokar myndast skyndilega getur það verið vegna ofnæmis fyrir einhverju sem er borið á andlit eða augu. Baugar og pokar verða oft meira áberandi hjá reykingafólki vegna áhrifa reykinga á æðar og húð. Ef þú hefur verulegar áhyggjur af baugum skaltu leita til læknis og þá sérstaklega ef pokar verða miklir og vökvasöfnun er líka annars staðar á líkamanum.
Gangi þér vel,
Guðrún Ólafsdóttir
Hjúkrunarfræðingur