Spurning:
Fyrir stuttu uppgötvaði ég það að ég væri ófrísk. Ekki mjög löngu áður varð ég fyrir því eina helgina að ég drakk helst til of mikið áfengi og er langt síðan ég hef orðið þetta ölvuð. Núna hef ég stórar áhyggjur af því hvort fóstrið gæti beðið skaða af þessari áfengisneyslu minni. Mér er alls ekki rótt yfir þessu. Eru miklar líkur á slíku?
Svo er það eitt enn. Fer maður nokkuð í krabbameinsskoðun ef maður er ófrískur?
Svar:
Það er lítið vitað um áhrif áfengis á fóstur svona snemma á meðgöngu þegar einungis er um eitt afmarkað tilvik drykkju að ræða. Öðru máli gegnir um mikla drykkju alla meðgönguna – þá ber barnið skaða sem kemur fram sem þroska- og greindarskerðing og einkennandi útlit fyrir "Fetal alcohol syndrome". það er ekki vitað hversu mikið eða lítið þarf að drekka til að fóstrið beri skaða.
Reyndu þó að spara þér áhyggjurnar – fóstrið hefur væntanlega rétt verið að taka sér bólfestu þegar þetta henti þig og því lítið blóðflæði um það og því fremur ólíklegt að það hafi borið skaða af.
Hvað varðar krabbameinsskoðunina þá er konum ráðlagt að fara í skoðun á tveggja ára fresti frá 20 ára aldri og ef meira en 1 og 1/2 ár er síðan þú fórst síðast er kjörið að fá krabbameinsskoðun núna í byrjun meðgöngu. Ef þú ert komin meira en 15 vikur á leið er þó ráðið frá því og þá væri best fyrir þig að fara 2-3 mánuðum eftir fæðingu.
Kveðja,
Dagný Zoega, ljósmóðir