Hvenær er hægt að segja að einhver hafi fengið taugaáfall, hvernig lýsir taugaáfall sér.
Sæl/l og takk fyrir fyrirspurnina
Taugaáfall er í raun ekki læknisfræðilegt hugtak, en tengist oft þunglyndi og kvíðaröskun (eins og almenn kvíðaröskun og ofsakvíði).
Það er ekki til ein útskýring á taugaáfalli, oftast er þetta þegar álag og/eða andleg streita verður það óbærileg að einstaklingurinn hættir að geta sinnt athöfnum daglegs lífs.
Ástæður fyrir taugaáföllum
- Lélegur svefn, eða erfiðleikar við að slaka á
- Mikil viðvarandi álag í vinnu
- Áföll, nýleg eða gömul sem er ekki búið að vinna úr – t.d. andlát fjölskyldumeðlims/ástvinar
- Skilnaður/sambandsslit eða erfiðar breytingar í lífinu
- Fjárhagserfiðleikar
Það sem einkennir einstaklinga í taugaáfalli:
- Borða og sofa lítið
- Einangra sig heima
- Mæta ekki til vinnu
- Forðast samkomur og samskipti við annað fólk
- Hirða ekki um sig sjálf, þvo sér ekki og fara ekki í hrein föt td.
Dæmi um þau einkenni sem einstaklingar hafa lýst í taugaáfalli:
- Ofsakvíðakast – brjóstverkur, öndunarerfiðleikar, hjartsláttatruflanir og fleira
- Ofsóknaræði
- Svefnleysi
- Ofskynjanir
Hér getur þú lesið þér frekar til um taugaáfall og viðbrögð við því.
Ef þig grunar að þú sert að fá taugaáfall eða ert í taugaáfalli mæli ég með að þú hringir í heilsugæsluna þína og fáir viðtal við lækni, eða farir á bráðamóttökuna ef þetta er óviðráðanlegt.
Gangi þér vel,
Sigrún Sigurjónsdóttir hjúkrunarfræðingur